艾莎尼比浪卡更接近 點解無八號波? 當年瑪媚打到正 一號波都無!
天文台最新預測艾莎尼會在本港以南約300公里掠過，點解比浪卡更接近都無八號波，甚至一號波都只係得一半機會需要發出？原因係艾莎尼環流較細小及緊密，烈風圈相當細小有關，而艾莎尼移近本港時亦一直減弱，所以一號波機會都只係得一半。由此可見，距離只係影響發出風球的其中一個因素，並非一個硬指標。
不過，天文台亦曾有相當具爭議的決定。1988年，熱帶風暴瑪媚在本港以東50公里的大亞灣登陸，但天文台從來無就瑪媚發出任何熱帶氣旋警告信號。當日本港有狂風驟雨，吹清勁北風，部分地區間中吹強風，天文台只發出雷暴警告，這個決定在今時今日是難以想像。雖說距離並非硬指標，但熱帶風暴級數的風暴非常接近本港之下完全無風球是相當危險的決定，萬一瑪媚路徑稍有偏差，本港便會吹烈風。近年天文台處理風暴一般都寧鬆勿緊，以公眾安全作最大考慮，相信今時今日不會再發生瑪媚的個案。
