元旦冬季季候風強度係點？
帶來冷空氣的系統，稱為極地渦旋，顧名思義就係一般會係北極圈的系統，但係當低緯度有暖空氣逼走佢，佢就會南下喇。
只不過大家可以想像佢做一舊蛋糕，到底係會被切兩刀、切四刀、定切八刀，呢樣係話唔埋，歐洲、亞洲、北美洲都要分蛋糕、邊度分多D、邊度少D都會影響個結果。
再者，好似我地之前提到，暖脊就好似瀡滑梯咁，將呢舊蛋糕瀡到邊個位置，要視乎條滑梯向邊。如果條瀡滑梯對住日本，咁樣就算亞洲舊蛋糕係最大舊都好，對香港影響都係有限。
現階段數值電腦對於瀡滑梯位置同蛋糕份量都係唔明朗，所以無論預測香港3度、13度定23度，都係睇下就好，當瀡滑梯同蛋糕清晰之後先會明朗化。
今日天文台更新呢張最低氣溫概率圖之後，有唔少朋友走黎問，係咪真係咁凍先？首先深藍色區域機率得10%以下，而且冷暖兩端都有。其次，睇概率圖的方法應該係睇個趨勢，多過走去睇實際數字，須知道元旦前所謂最高概率的10度附近，機會都係得20-30%機會，碇一次銀仔都有50%機會啦，可想而知而家變數有幾大。所以正確解讀方法係元旦前有降溫趨勢，但幅度言之尚早。