降雨概率同顯著降雨概率有咩分別？點運用？
天文台最近在九天天氣預報中推出顯著降雨概率預報，到底與傳統的降雨概率有咩唔同？
首先，天文台訂明顯著降雨的定義為本港廣泛地區雨量達10毫米或以上，並將顯著降雨概率分五級，分別為高、中高、中、中低及低。舉例說，中高概率代表當日有55-69%機會雨量達10毫米或以上。
問題黎喇，咁中低或者低顯著降雨概率係咪代表當日會無雨落？答案係否，當日依然有機會有零星降雨，不過當日雨量達到10毫米或以上機會較細，市民依然要睇埋九天天氣預報中天氣的描述先知道當日有無雨落。傳統降雨概率只顯示當日有無雨，即使當日傳統降雨概率高達90%，可以只係輕輕落少少雨。理論上，顯著降雨概率低而同時傳統降雨概率高係可以存在，當日降雨量唔多就可以成立。睇到呢度覺得好複雜？唔緊要，睇埋落去就會明。
簡單黎講，就係將顯著降雨概率睇做落湯雞指數就會好容易運用。顯著降雨概率預報主要用途係決定進唔進行戶外活動。每日10毫米或以上的雨量可以令全身濕透，唔想變落湯雞的話，見到顯著降雨概率高或中高就要認真考慮下有無需要將活動改期。