奧運天氣預報 Day 2: 雙帆並舉江之島 風暴逼近遇暗湧

要衝金,再特訓!預測星期日東京氣溫介乎24-33度,相對濕度百分之50-80,部分時間有陽光。奧運比賽第一日萬衆期待嘅劍擊項目,江旻憓晉身女子重劍個人賽8強,創下港隊歷來最佳成績。雖然室內行人止步,但嚟到戶外項目,女子單人雙漿賽艇復活賽洪詠甄就實現敗部復活,以小組第2名佳績成爲首位晉身半準決賽嘅香港運動員,星期日同樣時間朝早10點比賽繼續。公路單車賽方面,蔡曉鋒踩足153公里後遇上山路受阻遺憾未完成賽事,不過依然過咗一半路程。

星期日港隊戶外項目焦點當然唔少得滑浪風帆同帆船賽事。上晝11點05分

鄭俊樑就會率先出戰男子RS:X第1-3場賽事。RS:X其實就係帆板嘅標準級別,不過今屆東京奧運亦係最後一屆使用呢個標準,下屆就會換上更高速嘅帆板喇。同一時間仲有洛雅怡出戰帆船項目女子激光雷射型第1-2場,休息一陣到下晝陳晞文仲會出擊帆船項目嘅女子RS:X第1-3場。兩項賽事都將會繼1964年東京奧運後再次喺神奈川縣嘅江之島上演。由於海灣地形,預測場地將會係吹微風,不過水流亦會係影響因素之一。

至於有機會吹襲日本嘅熱帶氣旋尼伯特,雖然喺星期日未會顯著影響當地天氣,但東京奧組委已經決定將原定26號舉行嘅賽艇項目賽事全部提前一日進行。國際奧委會喺記者會上特別感謝日本氣象廳嘅預報技術支援,令到賽事可以提前改期唔使等到比賽當日先公佈,亦係今屆賽事嘅一大進步。我哋會密切留意風暴帶嚟嘅影響。奧運天氣預報,記得留意MET WARN跨平台全天候隨時放送。

#東京奧運

#氣象新聞