點解今次隻風會咁近岸形成？同煙花殘餘間接有關….?
點解今次隻風會咁近岸形成？好似石頭爆出黎咁？其實同煙花殘餘係間接有關。尋晚高空天氣圖顯示同煙花殘餘相關的西風槽異常南探至北緯30度以南。由於槽脊係一個相對概念，係西風槽以西有一個微弱高壓單體，單體東南面微弱的東北風同一直係南海北部維持的西南風係中國西南部形成一個低壓系統。隨著低壓區逐漸移到海上以及係低層發展出閉合環流，低壓區便增強為熱帶低氣壓。
正如我地早前另一個帖文提及，今年副高同季風槽都偏北，以往香港通常係季風低壓帶既北面，所以熱帶氣旋多數向西北移動靠近，但而家季風低壓帶位於華南內陸至沖繩，所以熱帶氣旋改為向東北移動。今次係中國西南部形成低壓區，逐漸在廣東沿岸水域東移增強並影響本港的熱帶氣旋，極為罕見。
這種「西成東移」的熱帶氣旋，近十年只有兩個例子比較接近；2018年山神於登陸越南後未有完全消散，於回馬槍東移時在北部灣重新增強，令本港離岸間中吹強風，惟山神並未有重新穿過雷州半島，於本港以西約400公里掠過。而2012年泰利則更為接近是次情況，泰利同樣為季風槽內生成的擾動，並於海南島以東海域增強成為熱帶氣旋，天文台一度發出三號強風信號，惟因其轉東北方向移動時已到達本港以南，與本港保持一段距離，因此香港最強風勢普遍於一號信號時錄得。
至於今次隻風對我地會有咩影響？熱帶氣旋南側是旺盛的西南氣流，而北側缺乏強盛的高壓脊產生足夠梯度效應，因此熱帶氣旋「南強北弱」的情況相當明顯。熱帶氣旋需要相當接近本港才會令本港風力顯著增強。