獅子山圓規直播後記：極具挑戰的一星期
熱帶氣旋獅子山及圓規接連襲港，兩日半內需要發出兩次八號風球。過往都曾經有風暴「前後腳」襲港，但今次兩者相隔時間，係我們經歷過中最短，對我哋MET WARN成員嘅挑戰性絕不低於山竹同天鴿。
首先回顧一下獅子山。獅子山嘅情況絕對係前所未見，由於獅子山環流廣闊，喺南海整合花咗很多時間，而佢喺發展初期有多過一個中心，導致數值預報結果好唔穩定，預報上有好大嘅難度。10月8號，獅子山異常持續同廣闊嘅雨帶整日不斷掃過香港，廣泛地區水浸，天文台一度要發出黑色暴雨警告，期間仲有令人難過既事故發生。
當晚，我哋要準備進行直播，報道風暴消息。但大家當日嘅關注點，似乎並唔係有無八號波，而當日朝早嘅黑雨。熟悉氣象嘅朋友都知道，預測暴雨嘅難度極高，我哋需要喺當日嘅直播將暴雨預測難度同現行機制嘅不足之處，以最合適嘅方法呈現到觀眾嘅眼前。所以我哋當日請黎另一位成員，以現場訪問嘅形式，希望增加互動，幫助大家去理解。呢個方法難度相當高，因為要對背景資料有充足的認識，好彩最後都能夠順利完成。
勢估唔到，星期六朝早突然掛起八號風球，當日開始不斷收到唔同朋友嘅PM，問我哋幾時會開live。由於時間同人手關係，最後要拖到黃昏先開到live，而且因為準備時間比平時少好多，所以第二次live係無辦法準備到稿件，只有少量短稿可以用。全節live大部分時間都要Ad-lib「爆肚」，按住幕後成員比嘅指示，按照直播畫面上面最新氣象數據，將一整日嘅情況同各位分析，可以話係相當驚險，亦都相當難忘。
獅子山過後就係圓規。圓規可以話係一個相當「聽話」嘅風，電腦模式對佢嘅預報一直都相當穩定，預報信心相當大。我哋係圓規襲港時開過兩次live，收看人數分別高達約2000同4300，創下收視新高。老實講見到有咁多人睇嗰下真係滴一額汗，不過有好多朋友不斷係留言為我哋打氣，我哋全部都睇到曬！
圓規襲港，大家最關注嘅係八號波會幾時掛同幾時落，由於圓規路徑好穩定，所以我哋當時評估好大機會要掛八號風球，而且大家有至少半日假嘅機會好高，不過我哋為免嘩眾取寵，不斷研究行文用字，點樣寫大家先會最容易接收到信息，而唔會感到混亂。
最後最後，真係辛苦MET WARN所有成員係風暴中緊守最前線，亦都希望各位朋友會滿意我哋嘅表現，我哋會繼續努力提供最新最詳盡嘅天氣資訊比大家！