獅子山襲港總結：突如其來的八號感覺
大家噚日（10月9日）一起身望到個登陸左海南島嘅風都可以為香港帶黎有紀錄以嚟最遠8號波，係咪都有「讓我心跳也因此震動過」嘅感覺呢？又或者大家可能都黑人問號左，點解前日（10月8日）橫風橫雨都係得3號，而個風行遠左就反而8號呢？
首先，天文台由10月7日晚上發出黃雨直至10月8日晚上全部暴雨警告取消，暴雨警告總生效時數長達20小時05分鐘，為有紀錄以嚟第二長，更打破十月單日降雨紀錄。而10月9日本港整體雨量亦比噚日少。觀感上，長時間嘅廣泛降雨疊加強風，往往比人橫風橫雨嘅感覺。亦解釋到點解會有市民認為，噚日比今日初時雨勢較弱期間風勢更為強勁。
而實際風力情況又係點呢？翻查三號強風信號發出嘅時候（10月8日凌晨4時40分）至同日午夜零時嘅風速資料，期間8站及部份港內站之最高10分鐘平均風速如下：
而10月9日凌晨過後至8號信號生效期間，8站及部份港內站最高10分鐘平均風速則如下：
而風球生效期間曾經錄得烈風或以上風力嘅地點同風速如下：
從以上嘅比較可以見到，10月9日嘅風力整體上的確比10月8日強。但事後回顧，凌晨過後至8號信號發出初時，實測風力充其量只係一個較強嘅3號信號；即使考慮到離岸及高地風勢普遍穩步上揚，兼暫且撇除8站準則，風勢似乎未增強至不發8號不可嘅地步，咁仲有咩因素逼使天文台要為一個登陸兼且已經稍有遠離嘅風暴發出8號信號呢？另一可能嘅因素係天文台就係考慮到電腦模式對本港當日日間風力嘅預測。
根據歐洲中期預報以及美國嘅電腦模式，兩個數值預報都顯示噚日（10月9日）日間嘅風力會有增強趨勢，並上升至7級強風左右嘅風力，離岸海域更加有機會達到8級烈風，機場天氣預報亦有出現類似預測。
而觀乎凌晨時份本港風力，特別係離岸及高地嘅風力的而且確一直不斷增強，鄰埠澳門三橋風力亦曾一度達到70公里以上，加上考慮到可能出現預報模式所預測嘅情況，逼使天文台「寧鬆勿緊」發出8號信號。而最終星期六市面情況亦一如所料，風勢拾級而上，8站之中有2站錄得烈風或以上風力，長洲更一度錄得暴風，對上一次長洲錄得暴風風力，已經係去年為本港帶嚟九號風球嘅海高斯襲港期間嘅事。而維港嘅風力亦達到7級強風程度，陣風不時達到烈風程度，反映發出8號信號嘅必要。