香港會唔會有大地震海嘯？ 威脅同影響可以有幾大？
今日凌晨惠東對出海域發生一次4.1級地震，本港各區都有市民感受到地震，幸好本地烈度不高。更值得留意的是馬尼拉海溝自清晨5點發生6.4級地震後，仍然不斷有較細規模地震。雖然沒有證據顯示該區會有大地震及海嘯發生，而且現今科技亦無辦法提早預測地震發生，但考慮到本港並唔係處於活躍地震帶，官方對於地震同埋海嘯教育比較少，MET WARN 特意發文提醒市民萬一有大地震同海嘯點樣應對，以免大家手忙腳亂。
首先同大家分析一吓本港大地震同海嘯風險。簡單嚟講，位於西北太平洋同印度洋嘅海嘯並唔會對我哋造成顯著影響，所以04年南亞大海嘯、11年日本311大地震全部都分別被印尼、菲律賓同台灣地形擋住，難以對我哋造成明顯影響。此外，越南沿岸同華南沿岸都唔係處於活躍地震帶同板塊邊沿，只有一啲斷層地震帶，一般嚟講發生特大地震機會一樣係唔大。
我哋唯一需要擔心係馬尼拉海溝同呂宋海峽一帶嘅海嘯，一嚟無地形擋住，二嚟呢啲區域處於板塊邊沿同活躍地震帶，係可以產生非常大規模地震同海嘯，甚至有學者指出呢個區域統計學上早就理應出現8級或以上地震，只係暫時比較幸運仲未出現，但係呢個潛在威脅非常大，雖然無辦法預測幾時會出現、市民亦無需恐慌，但係潛在威脅非常大嘅關係，有必要防患於未然，特別香港好少有明顯地震，市民意識一般唔及台灣、日本同菲律賓居民咁樣做好準備。
大地震發生嘅時候應該打開所有門以便災後逃生，如果屋企有堅固嘅檯就應該躲在檯底，盡量唔好靠近門窗、櫃同掛畫等等，以防被雜物擊中，亦唔應該搭𨋢。至於海嘯，就要視乎大家嘅位置，逃離沿海同低窪地區，唔好留喺比較矮嘅木屋同村屋，切勿逗留喺街上，應該躲入高樓大廈高層，如果屋企附近有山亦可以走到山上。
總括嚟講，本港目前無跡象有大地震同海嘯，市民無需擔心同恐慌，但係有需要知悉馬尼拉海溝有非常大嘅潛在威脅。假如不幸地真係有地震同海嘯，應該參考天文台同MET WARN 比大家嘅方法，冷靜應對。
Photo source: Qiu, Q., Li, L., Hsu, Y.-J., Wang, Y., Chan, C.-H., and Switzer, A. D.: Revised earthquake sources along Manila trench for tsunami hazard assessment in the South China Sea, Nat. Hazards Earth Syst. Sci., 19, 1565–1583, https://doi.org/10.5194/nhess-19-1565-2019, 2019.
