點解會有「前上下、後左右」搖晃？ 其實係同兩種地震波有關！
凌晨香港地震，係1979年短週期地震監測網成立以來香港100公里內最強嘅一次地震，首次達到4級或以上。MET WARN接到唔少朋友嘅報告，表示感到「前上下」、「後左右」般嘅搖晃。🧐究竟點解會出現咁嘅震動呢？其實係同地震波有關！⚠️
簡單嚟講，感受到兩種唔同方向嘅搖晃係因為兩種唔同嘅地震波所致。地震波分為P波(Primary Wave)同S波(Secondary Wave)，係因應地震波嘅傳播速度而分出嚟。P波嘅傳播速度比較快，約為每秒6.5公里。而S波就比較慢，約為每秒3.5公里。除咗傳播速度唔同之外，傳播方式亦都有唔同，P波帶畀我哋嘅感受係地表會呈「上下」震動，所以P波亦會被稱為「縱波」。而S波帶畀我哋嘅感受就係地表會呈「左右、打橫」搖晃，所以S波亦被稱為「橫波」。由於P波嘅傳播速度較S波快，所以今次地震部分朋友就會明顯感受到「先上下、後左右」嘅搖晃喇。
一般而言，P波所帶嚟嘅震動會較S波細，破壞力亦都會較弱，而大地震時會造成嚴重破壞嘅地震波，絕大部分都係由S波所造成。而今次地震，我地可以喺地震波形圖度睇到P波同S波嘅出現，喺最大搖晃出現前嘅較弱地震波就係P波，最大搖晃出現之後嘅就係S波。日本就睇中地震波嘅呢樣特點，同地震波鬥快發出警報。當捕捉到P波嘅時候就推算地震嘅強度，當預計地震嘅最大震度會達5弱或以上時，喺S波到達之前就發出緊急地震速報。不過呢個警報都有缺陷之處，例如位於震央正上方嘅地區就會趕唔切收到警報。