雨和暴雨 Rain and Rainstorm
大家成日覺得點解明明出面落狗屎，天文台都剩係出黃雨，甚至連黃雨都無出，係咪專登玩嘢啊？坦白講，有邊個未「問候過」天文台？小編以前未接觸氣象之前，仲讀緊中小學個陣，逢親返學放學落大雨都一定「問候」天文台，個陣對於暴雨警告係無乜概念，總之我行出門口個吓濕曬都無紅、黑雨就係天文台唔啱，大家有呢個反應都係人之常情，不過要了解點解好多時落狗屎都無紅、黑雨，首先要學識睇雷達圖先。
喺雷達圖上面各種顏色應該咁樣解讀：
藍色：一般代表毛毛雨或者小雨，多數都未必要擔遮
深綠色：開始要擔遮喇，不過一般都未至於鞋襪濕曬，係擔住遮可以繼續淡然行嘅程度
淺綠色：開始擔住遮都會覺得有落狗屎感覺，有機會鞋襪都濕曬
黃色、泥黃色、橙色：真正落狗屎。假如廣泛地區持續不斷咁落呢個級數，必定會出暴雨警告，有機會伴隨強陣風
紅色、紫色：危險！尤其係紫色，好有機會有強烈狂風雷暴，例如冰雹、水龍捲、龍捲風或者颶風程度陣風，極端起嚟連貨櫃都吹得跌
講到呢度就要同大家講一講降雨率呢個概念，大家最易誤會係深綠色、淺綠色同橙黃色呢幾個級別，深綠色持續落足一個鐘都係得幾毫米雨量，遠遠不及暴雨警告，淺綠色落足一個鐘都係得10至15毫米左右雨量，只有橙黃色落足一個鐘係夠30毫米或以上，達到黃紅黑雨標準，大家認為落狗屎嘅淺綠色雨區其實只係得十幾毫米，同暴雨警告爭好遠
更加重要嘅一點係，大家知道落雨都會急急腳行，非必要都唔會留喺條街淋一個鐘雨，喺呢個時候，呢個時候淺綠色或者黃色雨區喺你行出門口掃過就應該出暴雨警告，但個重點係好多時候都係唔持續。莫講話淺綠色雨區掃過，就算黃色雨區掃過，如果唔持續，都係唔洗出任何暴雨警告！呢個係大家對於暴雨警告落差嘅由來。
另外，講一講暴雨警告本身，天文台助理台長陳栢緯舊年曾經指出全港十幾個參考雨量站達標就會出暴雨警告，無三不成幾，當佢13至19個中間拉個平均，姐係16個。天文台之前亦曾經發文指佢哋參考全港超過100個雨量站，換句話講，只係需要全港16%或以下參考雨量站達標就發出黃紅黑雨，其實標準亦都唔算係嚴苛。近年天文台暴雨警告預警成份比以前大增，尤其係黃雨，只有虛報而無漏報，各級警告好多時都有10分鐘或以上lead time，其實已經進步咗唔少。如果要再進步就要等全球電腦運算能力更加高先做到，運作能力高咗就可以將大氣分為更多更細嘅等份，到時天氣預測會更加準確，但而家呢一刻進步空間真係唔多。