日本預測真係準過天文台？落雨一定18區都落全日？
香港人過往經常去日本旅行，亦因此不時將日本氣象廳預報同香港天文台對比，印象中覺得日本預報總係比香港準確，人哋好似預測落雨同轉晴時間都特別準，甚至唔少人因為唔信天文台預報，即使天文台預報落大雨繼續進行高風險戶外活動，到底點解會有落差，而呢種落差又係咪錯覺呢？
首先，除咗沖繩之外，日本本州、九州落大雨都離唔開溫帶氣旋、冬天鋒面系統同埋熱帶氣旋，落對流雨比例較少，天文台預測冬天鋒面系統移近及遠離時間一向都非常準確，而熱帶氣旋除非涉及藤原效應之類，否則多數都掌握得好好，所以個問題主要就係出喺對流雨個度（即係夏天短時驟雨個隻）。
對流雨一般尺度好細，發展同消散都好迅速，日本氣象廳同香港天文台預測呢類對流雨都好依靠臨近預報，作出短期內定時定點定量雨量預測。根據日本氣象廳技術報告，當地預測呢類對流雨同天文台小渦旋系統一樣，只可以對未來15分鐘左右作出比較準確預報，亦都係同天文台講預測暴雨只有15分鐘有效期一樣，好似上圖日本氣象廳預報咁，即使係短短15分鐘，強雨區位置同強度個誤差都非常之大，呢個已經係今時今日科技可以做到最好嘅水平，日本同香港兩地都係全球頂尖預報機構之列。
另一方面，大家好容易誤會朝早好天或者落雨就代表一定全日都會好天或者落雨，呢個概念喺夏天係絕對唔適用，因為積雲同積雨雲發展可以非常快，時晴時雨亦係好常見，預測當日落雨唔代表個天24小時都有黑雲覆蓋住，預測出太陽亦唔代表一嚿雲都無。再者，香港地形複雜，18區地區差異可以非常大，出暴雨警告個陣，新界落暴雨而港島出太陽，或者調返轉都唔罕見，一個整體嘅天氣預測係未必可以代表曬18區，只能夠代表大部分地方。
希望大家唔好因為唔信天文台預測天氣差而繼續進行高風險戶外活動，出門口好天唔代表全日都好天，反之亦然。盡量準確預測天氣係天文台責任，但做戶外活動之前留意天氣消息，避免明知天氣差繼續上山下海亦都係參加者嘅責任，否則出事個陣自己或者救援人員都可能有危險！